Published On: 23 Nëntor, 2016

Rubin: Përhapja e vahabizmit në Kosovë, e tmerrshme. Komandantët duhet të largohen (AUDIO)

Arbana Xharra

Sot 3 vjet, James Rubin porositi: “Unë shpresoj që njerëzit të cilët kanë qenë aq të rëndësishëm për revolucionin tuaj, për lirinë tuaj e kanë mençurinë të largohen sa janë në majë të suksesit të tyre”, ka thënë Rubin për “Zëri”.
Po te ishte degjuar kjo porosi e ish-diplomatit amerikan, ndoshta sot do te mund te evitonin edhe largimin me pranga ne duar per ne Hage.

Porosia tjeter e ti ishte: “Njera nga gjerat me te tmerrshme eshte perhapja e vehabizmit si rezultat i financimit te xhamive dhe shkollave fetare nga predikuesit ekstremiste”.

Është kthyer në Kosovën krenar që e ka ndihmuar këtë vend 14 vjet më parë, merita të mëdha i jep edhe miqve të tij të UÇK-së të cilëve u është mirënjohës për kontributin dhënë Kosovës.

Por, sot më shumë se një dekadë nga përfundimi i luftës, ish-diplomati amerikan, James Rubin shpreson se duhet të vijë koha kur krahu i luftës do ta kuptojnë se është mirë të largohen nga pushteti derisa janë ende të popullarizuar dhe të mos presin derisa është shumë vonë.

Në intervistën dhënë gazetës “Zëri”, Rubin, rikujtojë sfidat në kohët më të rënda për Kosovën, flet për miqtë e tij të UÇK-së dhe kontributin që kanë dhënë gjatë luftës, por jep edhe mesazh të qartë për ata.

“Unë shpresoj që njerëzit të cilët kanë qenë aq të rëndësishëm për revolucionin tuaj, për lirinë tuaj e kanë mençurinë të largohen sa janë në majë të suksesit të tyre”, ka thënë Rubin për “Zëri”.(Dëgjoje deklaratën-anglisht)


Deklarata e James Rubin për krahun e luftës në politikë – Zeri WEB TV

Rubin thotë se nuk dëshiron të jetë si diplomatët e dikurshëm të Departamentit të Shtetit kur kanë zgjedhur se me cilin krah të luftës duan të bashkëpunojnë, dhe se kosovarët nuk duhet pritur që ai të vijë e të tregojë se çfarë zgjedhje duhet bërë. “Nuk dua të jem si ata diplomatët e Departmanentit të Shtetit që zgjidhnin ‘jo unë dua të punojëme njerëzit e Rugovës e jo me ata të UÇK-së’.

Nuk dua të bëhem sikur ata shërbyesit e zyrës për punë të jashtme që thonin ‘unë e dua këtë njeri të UÇK-së e jo atë tjetrin. Kush jemi ne që të bëjmë zgjedhje të tilla… mos prisni që unë të vij këtu e t’iu them se kush duhet të jetë lidershipi juaj”, ka thënë Rubin. Ai porositë se sido që të të jetë e ardhja e tyre në pushtet ata duhet të punojnë shumë që vendi të zhvillohet e të mos lejojnë që gjendja e rëndë sociale të shfrytëzohet nga grupe radikale fetare. Ai kujton se gjatë luftës ka pasur shtete evropiane që e kritikonin ashpër Amerikën se po mbështet një vend që ka rrezik të bëhet shtet radikal islamik.

Zëri: Z. Rubin, njerëzit këtu iu kujtojë si një diplomat që e keni ndihmuar Kosovën gjatë kohës më të vështirë. Kanë kaluar 14
vjet pas luftës, a është Kosova siç keni pritur të jetë?

Rubin: Unë kam ardhur këtu dje pas një periudhe 10- vjeçare dhe më duhet të them se jam mjaft i impresionuar me ndryshimet fizike që kanë ndodhur këtu në 10 vitet e fundit. Janë bërë ndryshime të mrekullueshme në aspektin e rrugëve, ndërtesave dhe infrastrukturës. E dini, pas lirisë, modernizimi në Evropën e vitit 2013 është e komplikuar dhe është e qartë se këtu nevojitet më shumë punë dhe përmirësime.

Jam mjaft i lumtur të shoh sesi njerëzit këtu jo vetëm që e kanë fituar lirinë por e kanë shfrytëzuar mirë atë, duke arritur në pikën kur armiqtë e mëparshëm janë në gjendje të ulen së bashku duke e lënë të kaluarën prapa duke u fokusuar në çështjet e të ardhmes, e cila është shumë gjë e rrallë në botën moderne, pasi bota moderne kryesisht me historitë që ne fokusohemi, çështjet me të cilat ne përballemi janë mjaft brengosëse sikur çështja e Sirisë, Iraku, Avganistani dhe duke bërë krahasime, Kosova është një tregim i suksesit të komunitetit ndërkombëtar,Amerikës dhe të tjerëve.

Zëri: Megjithatë, ne s’mund harrojmë të përmendim raportet e shumta ndërkombëtare që flasin për nivel shumë të madh të korrupsionit dhe krimit të organizuar dhe akuzën që disa liderë politikë janë të përfshirë në këto fenomene?

Rubin: Mendoj se e di se për cilat çështje jeni duke folur dhe e kuptoj se njerëzit do të donin që gjërat të lëvizin përpara më shpejt, njerëzit do të dëshironin që akuzat për kriminalitetin të vërtetohen apo të hidhen poshtë, në njërën mënyrë ose tjetrën në aspektin individual.

Jam takuar me Ramush Haradinajn në një restaurant këtu dhe jam i impresionuar sesi shkoi vullnetarisht dhe u përball me gjykatën e Hagës, e cila është një gjest i rrallë pasi disa ikën dhe iu fshehën drejtësisë për dekada të tëra. U vërtetua se për disa gjëra që njerëzit mendonin se janë të vërteta, u shpallën të pavërteta, prandaj duhet të fokusoheni në atë që dihet dhe jo thashethemet. Nëse ne do t’i kishim dëgjuar thashethemet, dyshimet dhe brengat e konspiracionit gjatë viteve 98-99, më besoni se kurrë nuk do t’i kishim ndihmuar këtij vendi, pasi kishte shumë akuza dhe kundërakuza nga qarqet e Beogradit, Italisë dhe Spanjës për të injoruar gjërat që ndodhnin këtu.

Zëri: Përmendët Italinë dhe Spanjën dhe jemi kureshtar të dijmë se çfarë thanë ato në atë kohë?

Rubin: Mendoj se nuk është një sekret i madh që kishte vende evropiane që ishin mjaft skeptike për shqiptarët në përgjithësi dhe Kosovën në veçanti, posaçërisht për UÇK-në. Ata kishin qëndrim negativ për UÇK-në dhe nuk paraqet ndonjë sekret të madh që një numër i madh i liderëve evropianë na kanë thënë neve se SHBA-të nuk duhet t’i ndihmojnë këta njerëz, nuk duhet të jeni pjesë e asaj pasi që ka kriminelë dhe jo persona të duhur të cilëve duhet ndihmuar.

Pra  kishte gjëra specifike që janë thënë nga anëtarët e qeverisë së Italisë, Spanjës dhe disa vendeve tjera rreth UÇK-së, por pikëpamja ime e atëhershme dhe e sekretares së Shtetit ishte se duhet të bashkëpunojmë me përfaqësuesit e zgjedhur, ndër ta edhe me liderët e UÇK-së që ishin zgjedhur të merrnin pjesë në delegacionin e Rambuje-së. Shumë njerëz kishin dyshime se z. Thaçi mund të jetë një politikan i zoti duke thënë disa gjëra të tmerrshme në lidhje me të.

Zëri: Çfarë keni dëgjuar për të?

Rubin:Tani konkretisht nuk më kujtohen ato fjalë pasi kanë kaluar 15 vite, por ata nuk e pëlqenin idenë që të përkrahet UÇK-ja dhe le të jemi të sinqertë, pjesa dërmuese e asaj kritike specifike nuk doli të jetë e vërtetë. Te dy liderët, Thaçi dhe Haradinaj kanë evoluar në politikanë të duhur. A janë ata perfektë? Jo, janë larg nga ajo, por ata janë bërë politikanë të duhur të cilët marrin vendime të vështira për popullin e tyre.

Shikoni vendimet për të negociuar me Beogradin, jam i sigurt se ajo nuk ishte një alternativë e lehtë, pasi kam njohuri për protestat dhe e di se të uleni për të biseduar me armikun tuaj është gjë e vështirë duke ditur se kryeministri dhe presidenti i Serbisë ishin miq të Millosheviqit. Pra ky nuk ishte një vendim i lehtë për hapin e ndërmarrë dhe unë i përgëzoj për ketë. Kam dëgjuar këtë lloj të tregimeve për shumë vite dhe ajo çfarë kam mësuar është të mos paragjykohen njerëzit në mënyra të ndryshme por bazuar në fakte, përndryshe nëse lejoni thashethemet të udhëheqin jetën tuaj atëherë ajo nuk ju shpie askund.

Zëri: Serbia e fajësonte në atë kohë UÇK-në për krimin e organizuar, por edhe se këtë vend do ta udhëheqin islamikët e radikalizuar, të cilët dëshirojnë shtet islamik etj. A ishin këto shqetësimet që këto shtete evropiane i ndanin me ju?

Rubin: Natyrisht, po flasim për periudhën e vitit 1998, pra para sulmeve të 11 shtatorit, por ideja e ekstremizmit mysliman tanimë ishte e rëndësishme pasi që Bin Ladeni kishte sulmuar ambasadat në Tanzani dhe Keni, si dhe diskutohej për problemin e muxhahedinëve në Bosnjë. Por, përshtypja ime ishte dhe ende mbetet, se për t’i ngjyrosur të gjithë myslimanët me një brushë është diçka e marrëzishme. E dyta është se me lidershipin e UÇK-së që jam takuar dhe kam punuar, veçanërisht  me z. Thaçin por edhe të tjerët, janë siç i quaj unë, njerëz të civilizuar të botës moderne. Pra në lidhje me diskutimin për kërcënimin islamik, keni të drejtë se mund të dëgjohen pretendime të tilla por unë qëndroj këtu dhe nuk ndihem se jam në mesin e radikalëve islamikë.

Zëri: A besoni se është rrezik për Kosovën të jetë e hapur për grupe radikale fetare të cilat vijnë lirshëm nga vendet islamike duke përhapur ideologjinë që ishte e panjohur për ne?

Rubin: Ky nuk është një problem vetëm për Kosovën por është problemi për tërë vendet e Bashkimit Evropian. Nëse shikoni shifrat e Shërbimit Inteligjent Britanik të cilët njoftuan se ka shumë qytetarë britanikë të cilët kanë shkuar në Siri për të bashkëpunuar me grupet ekstremiste islamike, pra është një problem i hapur në shoqërinë perëndimore, në Angli, Francë, Gjermani, Turqi, dhe pra edhe në Kosovë ka ekstremistë.

Pra ata kanë shkuar në Siri të luftojnë në emër të islamikëve sunit, kundër Asadit. Unë i fajësoj liderët e komunitetit ndërkombëtar të cilët nuk ndihmuan në mposhtjen e Asadit më herët, që “Xhihadi” është duke bërë këtë gjë për një kohë të gjatë. Nëse Perëndimi do të intervenonte për të ndihmuar opozitën moderne në gjashtë muajt e parë apo pas një viti, nuk do të kishte gjasa për ato grupe ekstremiste islamike të shkojnë për të luftuar në Siri. Mendoni për miliona refugjatë sirianë të cilët janë të frustruar për mungesën e ndihmës siç u veprua me vendet e tjera, pra kemi një problem të madh si rezultat i luftës siriane.

Zëri: Në fakt, ky problem është nisur para konfliktit në Siri..Pas luftës (në Kosovë) kanë ardhur organizata arabe për qëllime humanitare..p,sh, kanë ofruar kurse (të gjuhës angleze dhe kompjuterit) pa pagesë për fëmijë, ndërsa ajo që është bërë është shpëlarja e trurit të atyre fëmijëve të cilët tani, pas 14 vitesh janë rritur dhe kemi të bëjmë me adoleshentë por edhe persona të rritur?


Deklarata e James Rubin për përhapjen e vahabizmit – Shiko VIDEON

Rubin: Njëra nga gjërat më të tmerrshme është përhapja e vehabizmit si rezultat i financimit të xhamive dhe shkollave fetare nga predikuesit ekstremistë. Por, më e keqja do të ndodhte po të mos intervenonte Perëndimi, kurse në Kosovë dhe Bosnjë kemi intervenuar në kohën e duhur duke parandaluar këta njerëz të involvohen sikur në rastin e Sirisë dhe Irakut pas rënies së Sadamit.

Pra nuk duhet lejuar hapësirë këtyre njerëzve të veprojnë, por njëkohësisht kjo paraqet problem në nivel botëror. Ajo çfarë dua të them se nuk është më keq këtu se në disa pjesë të vendeve evropiane. Ju shtroni pyetje për disa çështje që i keni hulumtuar, atëherë ato përbëjnë shqetësim, shpresoj që e tëra që mund  të bëni të shkojë në favor të njerëzve të mos bien pre e këtyre profiterëve të caktuar.

 

Zëri: Ju përmendet shtete të BE-së që kanë shprehur shqetësim gjatë luftës për atë se nga do shkojë Kosova, rrezikun që e kanë përmendur të bëhet shtet islamik. A mund të përdoret kjo si shkak tani nga vendet e BE-së kundër procesit të integrimit duke ndërlidhur Kosovën me grupet islamike?

Rubin: Shikoni, jam i sigurt se do të ketë diskutime të kësaj natyre dhe mënyra e vetme të evitoni atë gjë është që qeveria vendore të bashkëpunojë dhe të zbatojë sundimin e ligjit plotësisht dhe zgjidhja e vetme për atë problem është që ju të përballeni me të, por nuk mendoj se gjërat mund të shkojnë aq larg sa që kundërshtarët e integrimit të kenë në dorë argumente bindëse.

Ajo që kjo mund të bëjë është të ngadalësojë proceset dhe njerëzit më pas të humbasin entuziazmin, ndërsa BE është duke ndryshuar. Ndoshta BE pas 10 vjetësh nuk do të jetë Bashkimi Evropian që ishte para pesë vjetësh. Unë mendoj se në këtë rast, koha është armiku, e jo këto argumente.

Zëri: Duke pasur parasysh nivelin e lartë të papunësisë dhe përqindjes së madhe të njerëzve të varfër, a e krijon kjo gjendje sociale një mjedis ideal për ato grupe që të rriten edhe më?

Rubin: Shpresoj që jo, pasi që do të ndihesha i dëshpëruar për ndihmën e dhënë për njerëzit e Kosovës, nëse rezultati do të ishte ekstremizmi islamik në Evropë, ajo do të më bënte shumë të pikëlluar. Pra, shpresoj se autoritetet përgjegjëse të bëjnë çfarë të jetë e mundur që të ketë zhvillim ekonomik këtu.

E dini, kur shqyrtoni këto çështje bëheni pesimist, pasi që mund të ketë  arsye për të qenë i tillë, pasi që pesimizmi shpesh bazohet në të vërtetën, pa lënë anash optimizmin. Mendoj se para 3-4 viteve, nëse do të pyeteshin njerëzit se a do të bisedojnë liderët kosovarë me serbët dhe a do të arrihet një marrëveshje e tillë, shumica do të thoshin ‘jo’. Nëse para 10 viteve ju do të më kishit pyetur se a do të duket Prishtina kështu, unë do të thosha ‘jo’.

Pra, nëse e shikoni situatën në periudha më të gjata është shumë më lehtë. Nëse e vlerësoni situatën javë pas jave, kjo mund ta bëjë gjendjen të duket më frustruese. Unë jam me fat, pasi mund të largohem dhe të kthehem pas disa vjetësh dhe të them ‘shiko sa bukur është bërë këtu’. Por për njerëzit që jetojnë këtu jam i sigurt që gjërat po lëvizin shumë ngadalë.

Zëri: Nga përgjigjet ju dukeni i kënaqur me udhëheqjen vendore, një pjesë e së cilës dihet se ka përvojë ushtarake apo përvojë si luftëtarë. Në jo pak vende të dala nga lufta, liderët me përvojë ushtarake s’kanë vazhduar gjatë të jenë liderë politikë siç ndodh në Kosovë. A mendoni se është momenti që ata të tërhiqen dhe të lirojnë vendet për njerëzit të cilët nuk e kanë të kaluarën e tyre?

Rubin: Shikoni, ju thatë se unë jam i kënaqur me udhëheqjen e tyre, në fakt janë njerëzit e Kosovës të kënaqur, pasi që i kanë votuar ata njerëz, nuk jam unë ai i cili i ka votuar ata. A kanë qenë fer dhe perfekte, natyrisht që jo. Demokracia këtu është e re dhe nevojitet kohë e gjatë për formimin e partive të reja politike, për shtypin e lirë, pastaj sundimin e ligjit. Duhen gjenerata të tëra.

Në disa pjesë të botës kemi parë se një parti fiton shumicën dhe nuk sillet në mënyrë demokratike kur vijnë në pushtet. Përshtypja ime është nga ajo që kam dëgjuar dhe nga ajo që më është thënë se, liderët e juaj, jo vetëm që i kanë fituar zgjedhjet por edhe e kanë toleruar opozitën, pra kjo është zgjidhje, duke qenë tolerantë. Në rastin e z. Thaçi, toleranca e tij nuk është demonstruar vetëm nga dëshira e tij për të shkuar në bisedime dhe të tolerojë armiqtë e popullit të tij që janë liderët e Serbisë, të bëjë marrëveshje me ta, por kështu duhet të jetë toleranca dhe unë e përgëzoj për atë veprim. A duhet ai të tërhiqet apo a duhet Haradinaj dhe udhëheqësit tjerë të UÇK-së të tërhiqen, shpresoj se po.

Shpresoj se do të vijë koha kur ata do ta kuptojnë se është mirë të largohen derisa janë ende të popullarizuar dhe të mos presin derisa është shumë vonë. Pas sa viteve kjo mund të ndodhë, nuk e di, unë nuk jetoj këtu. Ju jeni gjykues më të mirë të kësaj. Por, sigurisht që shpresoj që miqtë e mi në UÇK që bën aq shumë për të ndihmuar lirinë e njerëzve këtu e kanë mençurinë që të largohen sa janë në majë të suksesit dhe të mos presin derisa të bëhet shumë vonë.

Zëri: Çështja është se jo të gjithë që jetojnë këtu pajtohen se bisedimet me Beogradin u nisën për shkak se një lider kishte kurajë për këtë. Ka njerëz në Kosovë që mendojnë se ata janë detyruar apo shantazhuar të marrin pjesë në ato negociata duke ditur të kaluarën e tyre?

Rubin: Nuk besoj se kjo është arsyeja që ai shkoi në bisedime me Beogradin, besoj se kjo është një shpifje dhe mendoj se ai nuk dëshiron t’i kthehet të kaluarës por të ecë drejt të ardhmes. Mos spekuloni, mos besoni se motivimet e njerëzve janë jo të mira. Çdo herë kam dëgjuar akuza të tilla për liderët e UÇK-së për këto 14 vitet e fundit dhe çdo 3-4 vjet që i kam përcjellë, ata kanë lëvizur drejt ardhmërisë dhe jo nga e kaluara dhe sa kohë duhet të kalojë që puna e tyre të dëshmohet.

E di për spekulimet e njerëzve në lidhje me motivimin, si dhe ka njerëz që spekulojnë me trafikun e organeve. Ne e dimë se prej nga e kanë gjenezën këto supozime, artikulli në “The New Yorker”e ka treguar se akuzat burojnë nga Serbia. A janë të vërteta apo jo, nuk ka pasur asnjë dëshmi për ato akuza. Prandaj mund të pyesni veten tuaj tërë jetën nëse ato janë të vërteta apo jo, por duhet t’i vlerësoni njerëzit nga ajo se çfarë keni parë në të vërtet dhe aktualisht çfarë shikuat.

Ju keni parë një udhëheqje që garon në zgjedhje, relativisht tolerante, në negociatat me Beogradin, protestat e njerëzve dhe kjo është diçka e vërtetë dhe jo imagjinatë. Kjo është se çfarë unë mund të bëj, të vlerësoj sipas realitetit. Nëse dikush më tregon diçka ndryshe, unë do të besoja, por deri atëherë kur do ta bazoj vlerësimin në lidhje me të.

Zëri: Për këtë arsye edhe ju pyeta nëse është koha për ndryshim në udhëheqësi, që të mos kemi më nevojë të merremi kaq shumë me ata të cilët fillimisht duhet të verifikojnë pafajësinë e tyre. P.sh. zotëri Haradinaj qëndroi vetëm 100 ditë si kryeministër dhe më pas u desh të tërhiqet dhe të verifikojë pafajësinë e tij tre herë..ndërkohë ne kemi mbajtur zgjedhje të jashtëzakonshme – pra a po humbasim kohë si shtet?

Rubin: Ndoshta është kështu, por nëse nuk do të ishin këta njerëz a do të ishit këtu ku jeni, a do të ishit të lirë.

Zëri:Shumë këtu mendojnë se jemi të lirë pikë së pari për shkak të Amerikës…

Rubin: E di por e vërteta është se ju jeni i lire dhe po rrimë lirshëm këtu në Prishtinë për shkak të një sërë rrethanash fatlume. Kemi pasur liderët e duhur të Amerikës, liderët e duhur në Rusi(Jelcini dhe jo Putini) dhe liderëve të jetës politike të Kosovës, të gjithë së bashku ju kanë sjellë në këtë pikë. Po, SHBA-të kanë dhënë ndihmesën e tyre dhe jam krenar për këtë, por nuk mund të vë në dyshim  popullsinë këtu. Ju mundeni nëse doni sepse jeni gazetar.

Unë vetëm mundem të vij këtu dhe të them se ata kanë fituar zgjedhjet, ato ishin relativisht të lira dhe fer dhe kush jam unë që të them se si duhet të organizohet procesi, por ju jeni gazetar dhe vazhdoni me punën tuaj duke u marrë me këto çështje dhe nëse nxirrni në pah(vërtetoni) dyshimet e njerëzve, dhe nëse ju e fitoni argumentin e popullit, ata humbin zgjedhjet. Ju mirëpres të arrini në atë pikë, nëse njerëzit vendosin se përfitimi i këtyre njerëzve është më i vogël sesa çmimi që po paguani në lidhje me Tribunalin e Hagës apo hetimet e BE-së, atëherë do t’i nxjerrin jashtë zyrave me anë të votimit . Por deri atëherë, kush jam unë që të bëj vlerësime.

E dini që njerëzit thonë se jemi involvuar në përzgjedhjen e tyre në vitin 1999, por ju them se nuk është ashtu. Njerëzit në tavolinën e Rambujesë kanë zgjedhur që Hashim Thaçi të jetë udhëheqësi i tyre dhe unë e kam pranuar atë zgjedhje duke mos kundërshtuar. Disa nga bashkë-diplomatët e mi amerikanë kanë dashur që ne ta bëjmë përzgjedhjen. Dikush thoshte ‘ne duam përfaqësuesit e Rugovës e jo këta të UÇK-së’, dikush thoshte ‘ne duam këtë personin tjetër e jo këta të UÇK-së’..të tjerët thoshin ‘ne duhet ta zgjedhim këtë njeri të UÇK-së e jo atë tjetrin’. Unë s’e kam bërë këtë gjë. Unë kam punuar me grupin që më është dhënë nga populli sa më mirë që kanë mundur në atë kohë.

Më pas unë ia kam bërë pyetjet e vështira atij..’A do e bëni këtë, a do e bëni atë…a do të evoluoni ju?’.Populli juaj duhet të bëjë ndryshimet. Nuk dua të jem si ata diplomatët e Departamentit të Shtetit që zgjidhnin ‘jo unë dua të punoj me njerëzit e Rugovës e jo me ata të UÇK-së’. Nuk dua të bëhem sikur ata shërbyesit e Zyrës për Punë të Jashtme që thoshin ‘unë e dua këtë njeri të UÇK-së e jo atë tjetrin. Kush jemi ne që të bëjmë zgjedhje të tilla.

Pra, mua më pëlqen që ju bëni pyetjet e vështira. Kjo është e drejta juaj, kjo është ajo që ju duhet të bëni, por mos prisni që unë të vij këtu e t’ju them juve se kush duhet të jetë lidershipi juaj.  Unë vetëm po ju them sinqerisht atë që e mendoj, ky është mendimi im. Unë nuk mundem të bëj përzgjedhje të tilla. Por unë shpresoj që njerëzit të cilët kanë qenë aq të rëndësishëm për revolucionin tuaj, për lirinë tuaj, e kanë mençurinë të largohen sa janë në majë të suksesit të tyre. Kjo thotë shumë.

Zëri:Më herët thatë se lidershipi i duhur në SHBA, a do të thotë kjo se Z. Clinton ishte më i vendosur për të ndihmuar Kosovën sesa të tjerët? Ne u ndihmuam në luftë nga Clinton, administrata e presidentit Bush na njohu si shtet dhe përkrahja vazhdon edhe nga Administrata e presidentit Obama. Ku qëndron dallimi?

Rubin: Nuk e di por mund të them se Amerika në kohët e tanishme nuk është duke përdorur të gjitha mjetet në dispozicion, përfshirë edhe ato ushtarake, për të promovuar lirinë siç ka bërë më parë dhe po të ekzistonte problemi i Kosovës në këtë kohë nuk e di se si do të veprohej, por mund të them se fokusimi i Presidentit, Kongresit dhe Administratës Amerikane nuk shtrihet shumë në botën e jashtme por më shumë në problemet e brendshme.

Është e vërtetë se Administrata e Bushit e njohu shtetin tuaj, është e vërtetë se Administrata e presidentit Obama vazhdon mbështetjen për Kosovën. Nuk e di se si do të shkonin gjërat me ndonjë president tjetër, por do të ishte më vështirë me presidentin Putin sesa Jelcinin. Gjithashtu e di se Administrata me të cilën kam punuar ka bërë përpjekje të mëdha të bashkëpunojë me rusët që të mos e përdorin veton.

Në rastin e Sirisë rusët kanë në dorë më shumë se veton dhe mendoj se ajo nuk është mënyra më e mirë të zgjidhet problemi. Do të doja që presidenti Putin të luajë rol konstruktiv në konfliktin e Sirisë, pasi që kemi miliona refugjate nga ai vend. Atë çfarë kanë bërë presidenti Klinton dhe sekretarja e Shtetit Madeline Albraight ishte e duhura në momentin e duhur të historisë, ndoshta dikush tjetër nuk do ta kishte kuptuar me kohë rrezikun që kanosej nga Millosheviqi. Pra njerëzit e Kosovës janë fatlumë se ajo ishte atje në kohën e duhur.

Loading...
 
Displaying 1 Comments
Have Your Say
  1. Barleti thotë:

    Ne censusin e popullsise te vitit 2011, qe njihet zyrtarisht jane deklaruar musliman 95,61 %, katolik 2,21% dhe ortodoks 1,49 %. Nese shikojme se sa jane Musliman shqiptaret e Kosoves, duhet te shikojme jeten dhe te vepruarit te tyre, qe nga festat e lindjes, fejeses marteses dhe festat fetare. Pastaj ceremonine vdekjes.Psh. Rrethprerja eshte tradidte tek islami dhe eshte konzervative. Nese nuk je besimtar, ateher nuk e ben femine synet( rrethprene). Sa jane te tille ne Kosove qe nuk e bejne femine synet? Mishi i derrit nuk perdoret per shkake te ndalesave qe ben feja, nese je sekulare apo jo besimtar islam ateher e hane mishin e derrit. Sa ka te tille ne Kosove qe jane mishin e derrit. Sa shitore sa retsaurante perdorin mishin e derrit?! Keni pare qytete ne Kosove si boshatisen per Ramazan, nese je sekular dhe jo besimtar, ateher nuk verehet kjo ne qytet. Sa kane reaguar kunder fanatizmit fetar, ku jane ata jo besimtar? Nje numer shume i vogel ka dale kunder dhe kritik ndaj fundamentalizmit. Shumica heshten ben sikur nuk po ndodh asgje. Kosova eshte vend islamik dhe vendi me islamik ne Evrope me 95,61% te popullsise. Me 10.887 km² me 1.800.000 banore, i ke mbi 812 Xhami. Kjo te tregon se besimtar dhe sa islamik eshte ky vend. Prandaj fundamentalizmi eshte rreziku me i madhe i kesaj shoqerie i cili per cdo dite eshte ne rritje. E shikojme sot psh debatin ne mbrojtje te nje shamie islamike, qe ka per qellim perhapjen e islamit dhe nje rregulli tjeter shoqerore qe eshte ne kundershtim te plote me vlerat kulturen shqiptare dhe perendimore.

    Përgjigjiuni
    Pelqej(3) Nuk Pelqej(0)

Leave a comment

XHTML: You can use these html tags: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>

Loading...

Kush duhet ti fitojë zgjedhjet në Kosovë?

Shiko rezultatet

Loading ... Loading ...