Published On: 18 Qershor, 2017

Rënia e lirë e një ish partie lidere

Gani Qarri

Zgjedhjet e fundit dëshmuan se tërheqja e Isa Mustafës nga kandidatura për kryeministër nuk mjaftoi dhe ishte hap i mangët për elektoratin e LDK-së.

Kjo parti, ka kohë që ndjenë nevojën për rifreskimin me kryetar dhe kryesi të re si dhe një reformim të thellë brenda saj.

Këtë e dëshmuan katërçipërisht edhe këto zgjedhje, në të cilat u pa se të gjitha bastionet e LDK, po bien njëra pas tjetrës dhe përveç Prishtinës të cilën Isa Mustafa e humbi dikur me “Duar në Xhepa” edhe qytetet tjera të mëdha e të vogla, me kryetarë të komunave që vijnë nga LDK, po i humbë një nga një.

Le të shohim, qoftë edhe sa për kuriozitet, se si bastionet e LDK-së, pësuan rëniet e njëpasnjëshme,pothuajse në të gjitha qendrat ku ajo si parti ka kryetarët: Po fillojmë nga qyteti i Ferizajt, udhëhequr nga Muharrem Sfarqa i LDK-s, i cili deri para pak kohësh, konsiderohej si kuadër me perspektiv, por që partia të cilës ai i takon, në këto zgjedhje nuk arriti të dal as e dyta me vota në qytetin që ai udhëheqë.

Derisa VV në Ferizajin e Muharrem Sfarqës ka marrë mëse 35 % dhe PAN rreth 31% sosh, koalicioni i kryesuar nga LDK, ka rënë në pozitën e fundit me më pak se 30 % të votave.

Rënien drastike të LDK-s, dhe koalicionit LAA, udhëheqësi i Ferizajt e arsyeton me veprimin e Isa Mustfafës që largoi Adem Salihajn nga lista e deputetit.

Por çfarë arsyetimi do të na jap Lutfi Haziri për Gjilanin, ku edhe aty fitoi Lëvizja Vetëvendosje, madje me dallim të madh kundrejt LDK-s. VV në këtë qytet ka arritur të sigurojë rreth 42% të votave, kurse i tërë koalicioni LAA me vetëm 27-8% të tyre.

Madje megjithëse në koalicion me disa parti politike,LDK humbi edhe në qytetin e Pejës,e cila në zgjedhjet e fundit komunale, ishte fituesja më e madhe. Derisa koalicioni PAN, siguroi mëse 37% të votave, koalicioni LAA- në Pejë mezi arriti në rreth 31% të tyre.

Njëjtë si në Ferizaj, Gjilan e Pejë, LDK ka humbë besimin e elektoratit në masë të madhe edhe në Fushë Kosovë. Edhe aty, Vetëvendosja doli para LDK-së, duke fituar rreth 35% të votave, kurse koalicioni LAA, me vetëm rreth 34 % sosh.

Po ashtu në Viti, e cila udhëhiqet nga Sokol Haliti i LDK-së, përsëri e para doli Lëvizja Vetëvendosje që siguroi më tepër se 37% të votave, ndërsa të shtatë partitë e koalicionit LAA, me në krye LDK-n, as 35% të tyre.

LDK pësoi edhe në Suharekën e udhëhequr nga Salih Asllanaj i LDK-s,ku koalicioni PAN arriti të jetë i pari me rreth 44% të votave, kurse LDK-ja me partnerë të koalicionit, nuk mundi të marrë as 35%  nga to.

E vetmja që vërtetë shkëlqeu në këto zgjedhje, ishte kandidatja e anashkaluar e Lidhjes Demokratike të Kosovës, kandidatja për deputete zonja Vjosa Osmani, e cila sikur zbuti sadopak dhembjen e humbjeve galoponte të partisë së saj dhe nga 40 mijë vota sa kishte në zgjedhjet e vitit 2014,kësaj radhe megjithëse u rendit e fundit dhe  vetëm nën numrin 81, të listës zgjedhore të koalicionit LAA, votuesit e gjetën emrin e saj dhe pothuajse i shprehën besim të dyfishuar asaj, duke i dhënë, siç u tha në fillim-rreth 60 mijë vota, ani pse ato tanimë u korrigjuan nga partia dhe paraqitën vetëm si 45 mijë sosh.

 Vjosa Osmani, mund të thuhet lirisht se ishte fituesja më e madhe brenda LDK-s, në këto zgjedhje e cila për nga votat, pothuajse ndanë vendin e parë me kandidatin për kryeministër nga koalicioni LAA, z. Avdullah Hoti.

 LDK, jo vetëm se humbi gati në të gjitha komunat ku udhëheqin politikanët e saj, por ajo ra edhe në pozitat e fundit nga partitë që në rrethana të Kosovës konsiderohen, si të mëdha.

Madje, derisa koalicioni PAN mori 34% të votave, Vetëvendosje e vetme arriti në 27% prej tyre, kurse LDK mbeti e fundit edhe si koalicion me vetëm 25.7% sosh, që përpjesëtuar në proporcion partie, befason shumë në rënie.

Këto zgjedhje sollën edhe një risi duke nxjerrë Bajram Gecajn e LDK-s, si humbësin rekord të tyre,personin që njihej si mbrojtësi më i zëshëm i qeverisjes së kaluar, i cili u ndëshkua  aq rëndë nga votuesit, sa ra  edhe në shifrën prej vetëm 8 votash.

Kjo tregon më së miri se sa në të vërtetë është lodhur elektorati i LDK- nga politikanët e konsumuar, humbës të zgjedhjeve shumë herë, të cilët LDK-n, si parti ish lidere ,nga lartësitë zenitore të Rugovës, e lëshuan kryengulthi, në rënie të lirë, e cila me verdiktin e fundit, pothuajse u plandosë tërësisht për toke.

Ndaj, sovrani foli me gjuhën e tij të qartë në këto zgjedhje dhe dëshmoi se ai përfundimisht kërkon ndryshime thelbësore edhe në LDK.Kështu që si z. Isa Mustafa ashtu edhe Agim Veliu,Lutfi Hazi ,Ismet Beqiri etj. duhet ta lexojnë drejtë porosinë e dhënë, kuptojnë si duhet mesazhin e votuesve dhe lëshojnë vendin kuadrove të reja dhe më të mirë që ka LDK, në mënyrë që me emra të rinj e të dëshmuar për punë e seriozitet, të forcohet e ngritët përsëri në këmbët e veta dhe fitoi namin që dikur LDK kishte, jo vetëm si parti por dhe organizatë gjithë-popullore, e adhuruar nga të gjithë.

Loading...
 

Leave a comment

XHTML: You can use these html tags: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>

Loading...